第1页 師承·補課·治學
- 章节名:師承·補課·治學
- 页码:第1页
因為看其是電子書,所以頁碼也無得標,隨看隨寫,算是筆記,也算是雜文,寫偌夥是偌夥就是。 茲本書為蜀口氣看好,是最近又拾起來看其,故此頭先看過其內容也記勿會當清楚了,也就儷是看遘底黨寫遘底黨了。 ①殖民主義教育 費先生寫遘伊去英國留學,伊其業師Malinowski讓伊住遘統治階級其社區,以此達遘“潛移默化”其目的。其實上汝看,現時其國家是伾是茲款?其實是蜀模蜀樣其。國家使普通話代替各地其語言,通過各種手段來移風易俗,服務其是乇儂?儷是蜀部份儂,伾是大部份儂。 現時國家因為大眾傳播工具(電視、報紙等)其出現,將伊其思想從南往北,從東遘西其傳乞各地其儂,以此達遘統一思想,進而為統治階級服務其目的,茲書點著英國儂是全無差別其。盡濟儂見覺茲是理所當然其,就想許塊殖民地其老百姓蜀樣。更呆其蜀點是因為我各儂本來就是統一其國家,各地其儂對茲蜀點都有伲囝全無意識其相貌,傳統其乇講bók就bók,全無伲囝溫情。 許我各儂有無必要因此見覺全無希望嘞?我看是無必要其。各地存在其儂其實上就是蜀種生態系統,儷使伊未乞儂消滅去,總有蜀工會重新將傳統其乇拾起來。我擔心其是乇嘞?我擔心其是有書工各地其儂想起著拾起來其辰候,乇已經無去了。所以現時若有可能,就著儘量記錄。 ②普通話教學 費先生講65年前吳文藻先生使普通話將外國課程是雅奇特其蜀件事,因為外國其課程本來都是外國儂使外語引外國其材料講其。 65年前,出去棠口其教會學校,屏南應該都是使平話講課其,看現時無蜀其學校伓是使普通話講課了。茲可以講是雅大其進步,也可以講是盡大其退步。 通過普通話,讓蜀中國其儂都可以口頭交流,而且採用其是漢語其形式,是歷史其需要,當然是無話講其。問題就是各地其儂經過宣傳(propaganda)以後,稠常矯枉過正,儷想將各地其語言消滅去,儷長 (diông) 普通話蜀家,茲蜀點背後問題盡大。 我稠常想,若是政府真正著阻止茲款其事計,其實是有辦法其,所以茲款其作為,其實上就是政府授意其。像計劃生育蜀類,生幾其傀儡本來就是權利,政府nié俪夺去,故变本加厉其对付许塊多生囝其侬,真真是太不堪去。 共費先生講其,人口太濟,不過儷是蜀其藉口,貧富不均,正儷是茲社會其矛盾。 汝看,人類學從無遘有,講課從外國話(我懷 (huà) 應該是英語)變成普通話,花去幾十年其時間,吳文藻先生從後生辰候就開始佈局,蜀部蜀部,最終完成,我儕儂也著有茲款其心,蜀步蜀步來,花幾代儂其時間來做母語復興其工作,惟其如此,故儷有辦法獨立于世,有獨立其想法與精神。
说明 · · · · · ·
表示其中内容是对原文的摘抄